தமிழகத்தில் பொது சுகாதாரத்துறை என்பது இந்தியாவின் மற்ற மாநிலங்களுக்கு ஒரு முன்னோடியாகவும் முன்மாதிரியாகவும் திகழ்கிறது. உயர்தர சிகிச்சை மற்றும் ஏழை எளிய மக்களுக்கான மருத்துவக் கட்டமைப்பு எனப் பெயரெடுத்த தமிழகச் சுகாதாரத்துறை, தற்போது ஒரு இக்கட்டான நிலையைச் சந்தித்து வருவதாக அரசு மருத்துவர்கள் எச்சரித்துள்ளனர். குறிப்பாக, தமிழகத்தின் மூன்றாம் நிலை சிகிச்சை அளிக்கக்கூடிய அரசுப் பொது மருத்துவமனைகளில் நிலவும் கடுமையான பணியாளர்கள் பற்றாக்குறை மற்றும் கட்டுக்கடங்காத நோயாளிகளின் எண்ணிக்கை அதிகரிப்பு ஆகியவை ஒட்டுமொத்த மருத்துவக் கட்டமைப்பையும் சிதைக்கும் நிலைக்குத் தள்ளியுள்ளன. கடந்த சில ஆண்டுகளில் மருத்துவமனைகளின் தரம் மற்றும் வார்டுகளின் எண்ணிக்கை உயர்த்தப்பட்ட போதிலும், அதற்கேற்றவாறு கூடுதல் மருத்துவர்கள் மற்றும் செவிலியர்கள் நியமிக்கப்படவில்லை என்பதுதான் கசப்பான உண்மையாக இருக்கிறது. இதனால் இருக்கும் மருத்துவர்கள் தங்கள் சக்திக்கும் மீறி நீண்ட நேரம் பணியாற்ற வேண்டிய கட்டாயத்திற்குத் தள்ளப்பட்டுள்ளனர்.பணிச்சுமை காரணமாக மருத்துவர்கள் கடும் மன உளைச்சலுக்கும் உடல் நலப் பாதிப்புகளுக்கும் ஆளாகி வருகின்றனர். ஒரு மருத்துவர் செய்ய வேண்டிய பணியை, பல இடங்களில் ஒருவரே மூன்று பேரின் வேலைகளைச் செய்ய வேண்டியுள்ளது. 24 மணி நேரத்திற்கும் மேலாக ஓய்வின்றிப் பணியாற்றுவது, அறுவை சிகிச்சைகளைத் தொடர்ந்து மேற்கொள்வது போன்றவை மருத்துவர்களின் கவனத்தை சிதறடிக்க வாய்ப்புள்ளது. இது நோயாளிகளுக்கு வழங்கப்படும் சிகிச்சையின் தரத்தையும் பாதிக்கலாம் என அஞ்சப்படுகிறது. பல ஆண்டுகளாகக் காலியாக உள்ள மருத்துவப் பணியிடங்கள் இன்னும் நிரப்பப்படாமல் இருப்பது, இந்த நெருக்கடியைத் தீவிரமாக்கியுள்ளது. அரசு உடனடியாகத் தலையிட்டு காலிப் பணியிடங்களை நிரப்புவதுடன், மருத்துவர்களின் பணி நேரத்தை முறைப்படுத்த வேண்டும் என மருத்துவச் சங்கங்கள் கோரிக்கை விடுத்துள்ளன. தமிழகத்தின் பெருமைக்குரிய சுகாதாரக் கட்டமைப்பு சீர்குலையாமல் இருக்க, போர்க்கால அடிப்படையில் நடவடிக்கை எடுக்கப்பட வேண்டும் என்பதே சமூக ஆர்வலர்களின் கருத்தாக உள்ளது. இல்லையெனில், இந்த அமைப்பு முற்றிலும் செயலிழக்கும் அபாயம் உள்ளதாக மருத்துவர்கள் எச்சரிக்கின்றனர்.
தமிழக அரசு மருத்துவர்கள் கடும் பணிச்சுமை: முடங்கும் அபாயத்தில் சுகாதாரத்துறை? அதிர வைக்கும் உண்மைகள்!
