தமிழகத்தில் செயற்கை நுண்ணறிவு தொழில்நுட்பத்தின் தாக்கம் மற்றும் எதிர்கால வேலைவாய்ப்புகள் குறித்த மிக முக்கியமான அறிக்கையை மாநில திட்டக் குழு வெளியிட்டுள்ளது. ‘தமிழ்நாடு: ஏஐ மற்றும் எதிர்கால பணியாளர்கள்’ என்ற தலைப்பில் வெளியிடப்பட்டுள்ள இந்த அறிக்கையில் தமிழகத்தின் தற்போதைய கல்வி மற்றும் வேலைவாய்ப்பு சூழலில் அடுத்த ஐந்து முதல் ஏழு ஆண்டுகளுக்குள் மிகப்பெரிய மாற்றங்கள் தேவை என்று வலியுறுத்தப்பட்டுள்ளது. இல்லையெனில் மாநிலத்தின் பொருளாதார வளர்ச்சி மற்றும் மக்கள்தொகை சார்ந்த நன்மைகள் பாதிக்கப்படக்கூடும் என்று எச்சரிக்கப்பட்டுள்ளது. குறிப்பாக சென்னை மற்றும் ஓசூர் போன்ற தொழில் மையங்களை இணைக்கும் வகையில் ஒரு பிரத்யேக வாகன உற்பத்தி மற்றும் ஏஐ திறன் மேம்பாட்டு மண்டலத்தை உருவாக்க வேண்டும் என்று பரிந்துரை செய்யப்பட்டுள்ளது.
இந்த மாற்றங்களை எதிர்கொள்ள இளங்கலை பட்டப்படிப்புகளில் ஏஐ குறித்த அடிப்படை அறிவை கட்டாயமாக்க வேண்டும் என்று அறிக்கை கூறுகிறது. மேலும் உயர்கல்வி நிறுவனங்கள் தங்கள் பாடத்திட்டங்களை சந்தை தேவைக்கு ஏற்ப மாற்றியமைக்க வேண்டும். தமிழகத்தின் தொழிலாளர் சந்தையில் ஏற்படப்போகும் இந்த தொழில்நுட்ப புரட்சியை ஒரு வாய்ப்பாக மாற்றிக்கொள்ள அரசு மற்றும் தனியார் நிறுவனங்கள் ஒருங்கிணைந்து செயல்பட வேண்டியது அவசியம். குறிப்பாக ஆட்டோமொபைல் மற்றும் தகவல் தொழில்நுட்பத் துறைகளில் ஏஐ பயன்பாடு அதிகரிக்கும் என்பதால் தொழிலாளர்களுக்கு புதிய தொழில்நுட்ப பயிற்சிகளை வழங்குவது மிக முக்கியமான தேவையாக மாறியுள்ளது. வரும் ஏழு ஆண்டுகளில் இந்த முன்னேற்பாடுகளை செய்யத் தவறினால் வேலைவாய்ப்பின்மையில் சிக்கல்கள் எழக்கூடும் என்று அந்த அறிக்கை விரிவாக விளக்குகிறது.
