சிவகங்கை: தமிழர்களின் பண்டைய நாகரிகத்தையும், 2,600 ஆண்டுகளுக்கு முந்தைய வாழ்வியலையும் உலகிற்குப் பறைசாற்றும் இடமாக சிவகங்கை மாவட்டம் கீழடி திகழ்ந்து வருகிறது. இந்நிலையில், அங்கு நடைபெற்ற அகழாய்வின் போது கண்டெடுக்கப்பட்ட தொல் பொருட்களை, அவை கிடைத்த இடத்திலேயே பொதுமக்கள் பார்வையிடும் வகையில் அமைக்கப்பட்டுள்ள பிரம்மாண்ட திறந்தவெளி அருங்காட்சியகத்தை (Open-Air Museum) தமிழ்நாடு முதலமைச்சர் மு.க.ஸ்டாலின் நாளை (வெள்ளிக்கிழமை) திறந்து வைக்கவுள்ளார்.
வைகை நதி நாகரிகத்தின் சிறப்பை வெளிக்கொண்டு வரும் வகையில், கீழடியில் இதுவரை ஒன்பது கட்ட அகழாய்வுப் பணிகள் நிறைவடைந்துள்ளன. தற்போது பத்தாம் கட்ட அகழாய்வுப் பணிகள் நடைபெற்று வருகின்றன. முன்னதாக, கண்டெடுக்கப்பட்ட பொருட்களைக் காட்சிப்படுத்துவதற்காகச் செட்டிநாடு கட்டிடக் கலை நயத்துடன் கூடிய பெரிய அருங்காட்சியகம் ஒன்று ஏற்கனவே திறக்கப்பட்டு மக்கள் பயன்பாட்டில் உள்ளது. அதனைத் தொடர்ந்து, அகழாய்வுக் குழிகளில் கண்டறியப்பட்ட செங்கல் கட்டுமானங்கள், உறைக் கிணறுகள் மற்றும் வடிகால் அமைப்புகளைச் சேதப்படுத்தாமல், அவை இருந்த நிலையிலேயே பாதுகாத்து பொதுமக்கள் பார்ப்பதற்காக இந்த புதிய திறந்தவெளி அருங்காட்சியகம் உருவாக்கப்பட்டுள்ளது.
சுமார் 22 கோடி ரூபாய் மதிப்பீட்டில் இந்தத் திறந்தவெளி அருங்காட்சியகம் அமைக்கப்பட்டுள்ளது. அகழாய்வு மேற்கொள்ளப்பட்ட இரண்டு தளங்களை இணைத்து, வெயில் மற்றும் மழையிலிருந்து பாதுகாக்கும் வகையில் நவீன கூரை அமைப்புகள் ஏற்படுத்தப்பட்டுள்ளன. பொதுமக்கள் குழிகளுக்குள் இறங்கிச் செல்லாமல், மேலே அமைக்கப்பட்ட நடைமேடைகள் வழியாகச் சென்று, பழங்காலத் தமிழர்களின் வீடுகளின் அமைப்பு, தொழிற்சாலைகள் மற்றும் நீர் மேலாண்மை முறைகளை நேரடியாகப் பார்வையிட ஏற்பாடுகள் செய்யப்பட்டுள்ளன.
நாளை சிவகங்கை மாவட்டத்திற்குச் சுற்றுப்பயணம் மேற்கொள்ளும் முதலமைச்சர் மு.க.ஸ்டாலின், இந்தத் திறந்தவெளி அருங்காட்சியகத்தைத் திறந்து வைத்துப் பார்வையிட உள்ளார். இது தமிழர்களின் வரலாற்றுத் தடங்களை அடுத்த தலைமுறைக்குக் கொண்டு செல்லும் மிக முக்கியமான முயற்சியாகப் பார்க்கப்படுகிறது. இந்த அருங்காட்சியகம் திறக்கப்பட்டவுடன், கீழடிக்கு வரும் சுற்றுலாப் பயணிகள் மற்றும் வரலாற்று ஆய்வாளர்களின் எண்ணிக்கை மேலும் அதிகரிக்கும் என்று எதிர்பார்க்கப்படுகிறது.
ஏற்கனவே செயல்பட்டு வரும் அருங்காட்சியகத்தில் தொல்பொருட்கள் காட்சிப்படுத்தப்பட்டுள்ள நிலையில், இந்தத் திறந்தவெளி அருங்காட்சியகம் மூலம் பண்டைய தமிழர்கள் வாழ்ந்த இடத்தையும், அவர்களின் கட்டிடக்கலை நுணுக்கங்களையும் உள்ளபடியே பார்க்கும் வாய்ப்பு பொதுமக்களுக்குக் கிடைக்கும் என்பது குறிப்பிடத்தக்கது.
ஆதாரம்: Maalaimalar
